Нүүр хуудас Мэдээ Хошууч генерал Б.Хурцыг шүүнэ

Хошууч генерал Б.Хурцыг шүүнэ

Tugmn
Tugmn, TUG.MN

   Авлигатай тэмцэх газрын дэд, Тагнуулын ерөнхий газрын даргаар ажиллаж байгаад Элчин сайдаар томилогдох болсон хошууч генерал Б.Хурцыг цагдаагийнхан хойшлуулшгүй ажиллагаа явуулж уржигдар орой саатуулжээ. УИХ-ын гишүүн, Дэд бүтцийн сайд С.Зоригийн амийг бүрэлгэсэн гэх хэрэгт холбогдон ял шийтгүүлсэн Б.Содномдаржаа, Т.Чимгээ нарыг эрүүдэн шүүж, хүчээр хэрэг хүлээлгэсэн байж болзошгүй үйлдэлд хошууч генералыг холбогдуулан МБА-ны Тусгай субъектийн үйлдсэн болон Онц хүнд гэмт хэрэг мөрдөн шалгах хэлтсийнхэн шалгаж эхэлсэн аж. Энэ талаар өчигдөр ЦЕГ-ын Хэвлэл мэдээллийн төвийн дарга, дэд хурандаа Б.Баатархүү “2002 оны Эрүүгийн хуулийн 133 дугаар зүйлд заасан гүйцэтгэх ажиллагааны хууль, журам зөрчсөн хэмээн эрүүгийн хэрэг үүсгэн АТГ-т шалгаж байсан үйлдлийг Улсын ерөнхий прокурор харьяалал тогтоон, өнгөрсөн баасан гарагт Мөрдөн байцаах албанд шилжүүлсэн. Улмаар хошууч генерал Б.Хурцыг энэ сарын 23-нд хойшлуулшгүй ажиллагааны хүрээнд түр саатуулан шалгаж байна. Үргэлжлүүлэн хорих саналаа цагдаагийн байгууллагаас прокурорт хүргүүлсэн. Цагдан хорих, эсэхийг шүүх, прокурорын байгууллага хуулийн дагуу шийдвэрлэнэ” гэсэн юм. 

   Харин нийслэлийн төвийн зургаан дүүргийн Эрүүгийн хэргийн анхан шатны шүүхэд Б.Хурцыг үргэлжлүүлэн хорих, эсэхийг шийдвэрлүүлэхээр прокурорын байгууллагаас хандаагүйг эх сурвалжууд батлав. Гэхдээ ШШГЕГ-ын харьяа Цагдан хорих 461 дүгээр ангийнхнаас авсан мэдээллээр, Б.Хурцыг ганцаарчлан хорьж буй аж. Б.Содномдаржаа, Т.Чимгээ нарыг эрүүдэн шүүж, хүчээр хэрэг хүлээлгэсэн гэх үйлдэлд холбогдуулан ТЕГ-ын Мөрдөн байцаах газрын мөрдөгч, хурандаа Б, дэд хурандаа У, ШШГЕГ-ын Тогтоол гүйцэтгэх албанд офицероор ажиллаж байгаад чөлөөлөгдсөн, Б.Хурцын хадам дүү Ү.Отгонбаяр, хорих ангийн төлөөлөгч, хэрэгт холбогдон ял шийтгүүлсэн дээрх хоёр хүнийг айлган сүрдүүлж буй бичлэгт байгаа хүмүүжигч Итгэлтөгс нарын хүнийг АТГ-т шалгаж байсан билээ. Харин Улсын ерөнхий прокурор шинээр харьяалал тогтоосноор цагдаагийн байгууллага шалгаж эхэлсэн нь энэ. Ийнхүү хэрэг шилжиж очихын өмнөх өдөр ЦЕГ-ын удирдлага гэнэт тушаал шийдвэр гаргаж, МБА-ны Тусгай субъектийн, Хүрээлэн буй орчны эсрэг, Онц хүнд, хүнд гэмт хэрэг мөрдөн шалгах хэлтсийн дарга нарыг хооронд нь сэлгэн томилсон нь цаанаа нэг учиртай биз ээ.

   Дугаар шилжих мөчид авсан мэдээллээр, хошууч генерал Б.Хурцыг үргэлжлүүлэн хорих саналаа НПГ-аас Чингэлтэй дүүргийн Эрүүгийн хэргийн анхан шатны шүүхэд хүргүүлэх болжээ. Харин тус шүүхийнхэн өнөөдөр хүсэлтийг нь хүлээн авч хэлэлцэх ч хурал хийх цагийг хараахан товлоогүй байв.

Хаха 0 0 Таалагдсан 0 Гунигтай 0 Нүдний булай 0 Пөөх
ТҮГЭЭХ
Өмнөх нийтлэлМонгол Улсын Ерөнхийлөгч Х.Баттулгад БНХАУ-ын Төрийн зөвлөлийн Ерөнхий сайд Ли Көчян бараалхав
Дараагийн нийтлэл “Ю Би Констракшн” ХХК-д Сүхбаатарын талбайн урдах газрыг чөлөөлөх мэдэгдэл хүргүүллээ

АНХААР! Сэтгэгдэл хэсэгт ёс бус бичвэр оруулахыг хориглоно.

0 СЭТГЭГДЭЛ

ХАРИУ ҮЛДЭЭХ

Сэтгэгдэл ээ оруулна уу
Та нэрээ бичнэ үү