Герман улс тамхины татварыг нэмэгдүүлж, 2030 он гэхэд нэг хайрцаг тамхины үнэ 12 еврод дөхөж болзошгүй

Германд одоогоор 20 ширхэг тамхитай нэг хайрцаг тамхи дунджаар 8.05 еврогийн үнэтэй байгаа ч, Бундестаг (Германы Холбооны парламент) тамхины татварыг үе шаттайгаар нэмэгдүүлэх шийдвэр гаргаснаар энэ үнэ өөрчлөгдөх төлөвтэй байна. Хуулийн төсөлд тусгагдсан тооцооллоор, нэг хайрцаг тамхины үнэ 2027 онд 8.77 евро, 2028 онд 9.56 евро, 2029 онд 10.42 евро, харин 2030 онд 11.36 евро болж өсөхөөр байна.

Зарим дээд зэрэглэлийн тамхины үнэ 14 евро хүртэл өсөж болзошгүй бөгөөд гараар ороож татдаг тамхины үнэ ч мөн мэдэгдэхүйц нэмэгдэх төлөвтэй байна. Ийнхүү Германд тамхины үнэ Европын бусад орнуудын үнийн түвшинд аажмаар дөхөж очиж байгаа хэдий ч Ирланд, Франц, Нидерланд зэрэг Европын хамгийн өндөр үнэтэй зах зээлүүдтэй харьцуулахад хямд хэвээр байна.Засгийн газар татварын орлогоо нэмэгдүүлэхийг зорьж байна Германы Засгийн газар татварыг нэмэгдүүлэх замаар ирэх дөрвөн жилийн хугацаанд нэмэлтээр 12 тэрбум еврогийн орлого олохоор төлөвлөж байна.

Өнгөрсөн жил Засгийн газар тамхины татвараас 17.6 тэрбум еврогийн орлого олжээ. Гэвч тамхины салбарынхан Засгийн газрын тооцоолж буй хэмжээний орлого цугларна гэдэгт эргэлзэж байна. Салбарын төлөөлөгчдийн анхааруулж буйгаар, татвар өндөр болох нь тамхи татагчдыг хар зах руу түлхэх, эсвэл Европын холбооны бусад орноос хямд тамхи худалдан авахад хүргэж болзошгүй юм. Үүнээс болж хууль ёсны дагуу тамхи худалдаалдаг бизнесүүд хамгийн их хохирол амсаж болзошгүй байна. Христийн Ардчилсан Холбоо (CDU) намын гишүүн Карстен Бродессер татварыг арай бага хэмжээгээр нэмэхийг уриалсан юм. “AfD”, “Die Linke” болон Ногоон нам (Die Grünen) татварын өсөлтийг шүүмжилж байна. 2025 оны хүн амын түүвэр судалгааны (microcensus) мэдээллээр, Германд 15 ба түүнээс дээш насны хүмүүсийн 19 орчим хувь нь тамхи татдаг байна. Үүнээс 14 хувь нь тогтмол, 5 хувь нь хааяа тамхи татдаг аж. Германы Хавдар судлалын төвийн мэдээлснээр, 2023 онд тамхитай холбоотой өвчлөлийн улмаас 131,000 орчим хүн нас баржээ. Эрүүл мэндийн салбарын мэргэжилтнүүд тамхины үнийг өсгөх нь хүмүүсийг тамхинаас гарахад түлхэц болох үр дүнтэй арга хэрэгсэл гэж үздэг. https://www.euronews.com/2026/10/16/germany-set-to-hike-tobacco-tax-cigarette-packs-could-reach-close-to-12-by-2030