Монголчуудын хоолны үндсэн хольц нь малын мах билээ. Монгол малын мах бие махбодын өсөлт, хөгжилт, нөхөн төлжилт, биеийн эсэргүүцлийг сайжруулж, уургийн хэрэгцээг хангахын зэрэгцээ өндөр илчлэг бүхий өөх тосоор бие махбодыг хангахад чухал үүрэг гүйцэтгэдэг.
Махны уураг нь бие махбодид нийлэгжих замаар үүсдэггүй, үл орлогдох амин хүчлийг агуулсан төгөлдөр уургийн эх үүсвэр юм. Монголын таван хошуу мал нь жилийн дөрвөн улиралд бэлчээрлэн явж, олон төрөл зүйл ургамлаас өөрт хэрэгцээтэйг зөнгөөрөө олж иддэг тул мах нь жинхэнэ байгалийн бүтээгдэхүүн мөн. Төрөлх жамаараа бүрэлдэж бий болдог тул бэлчээрийн малын мах тод өнгөтэй, амт үнэр сайтай, шүүслэг, хадгалалтад тэсвэртэй байдаг. Бэлчээрийн малын мах хүнд элемент багатайн дээр цацраг идэвхит изотопын бодисоор бохирдоогүй тул экологийн цэвэр маханд тооцогддог.
