АНУ-ын шүүх Мета компанид 25 тэрбум ам.долларын торгууль ногдуулав

АНУ-ын шүүгч Мета компанийг Фэйсбүүк хэрэглэгчдийг нууцлалын талаар хуурсан хэргээр 25 тэрбум ам.долларын торгууль төлөхийг тушаав. Энэ нь олон сая америкчуудаас улс төрийн кампанит ажилд зориулж хувийн мэдээллийг цуглуулсан хэргийг илчилсэн Кембриж Аналитикагийн дуулианаас үүдэлтэй түүхэн шийдвэр юм. Нью Мексико дүүргийн шүүгч Фрэнсис Мэтью есдүгээр сард Фэйсбүүкийн толгой компанийг муж улсын хэрэглэгчийн эрхийг хамгаалах тухай хуулийг бараг 44 сая удаа зөрчсөн гэж үзсэн. Шүүгч Мета компанийн буруутай үйлдэл нь муж улсын хуулийн дагуу 219 тэрбум ам.доллароос давсан торгууль ногдуулах ёстой гэж дүгнэсэн боловч уг хэмжээг 25 тэрбум доллар болгон бууруулсан нь Америкийн корпорацид ногдуулсан хамгийн том санхүүгийн торгуулийн нэг болжээ.

Энэхүү хэрэг нь 2018 оны “Cambridge Analytica”-тай холбоотой дуулианаас үүдэлтэй бөгөөд тухайн үед Британийн улс төрийн зөвлөх үйлчилгээний тус компани нь "Facebook"-ийн 87 сая хүртэлх хэрэглэгчийн хувийн мэдээллийг тэдний зөвшөөрөлгүйгээр олж авсан нь илэрсэн юм. “Cambridge Analytica” нь уг мэдээллийг сонгогчдын сэтгэл зүйн профайлыг боловсруулах, улс төрийн зорилтот сурталчилгааг хүргэхэд ашигласан байна.

Ерөнхий прокурор Рауль Торрез лхагва гарагийн шийдвэрийг хамгийн том технологийн компаниуд хүртэл хэрэглэгчийн эрх ашгийг хамгаалах тухай хуулийг зөрчсөн тохиолдолд хариуцлага хүлээлгэдэг гэсэн анхааруулга гэж сайшаажээ. Мета компани хэрэглэгчдийг төөрөгдүүлсэн гэсэн мэдээллийг үгүйсгэж, уг шийдвэрийг давж заалдахаар төлөвлөж байгаа бөгөөд урьд өмнө байгаагүй шийтгэл нь Үндсэн хуульд харшлах болно гэж үзэж байна. Өнгөрсөн сард шүүхийн шийдвэрт хариу өгөхдөө тус компани үг хэлэх эрх чөлөөг мөн дурдаж, “Facebook” бол үзэл бодлоо чөлөөтэй илэрхийлэх талбар гэдгийг онцолсон.

https://rt-english.com/news/647504-meta-billion-fine-cambridge-analytica/