Хятад бол АНУ-ын 19-р зуунаас хойших үеийн хамгийн хүчтэй өрсөлдөгч

   АНУ болон БНХАУ-ын өндөр албан тушаалтнууд өнөөдөр Аляскад уулзах бөгөөд дэлхийн тэргүүлэх хоёр гүрний харилцааны динамикийг тодорхойлох нүүр тулсан анхны уулзалт болох юм. АНУ-ыг төлөөлж тус улсын Төрийн нарийн бичгийн дарга Антони Блинкен, Үндэсний аюулгүй байдлын зөвлөх Жейк Салливан нар, Хятадын талаас топ дипломатч гэгддэг Ян Жиечи, Гадаад хэргийн сайд Ван И нар уулзах аж. АНУ, БНХАУ-ын харилцаа нь олон жилийн турш таагүй байсан бөгөөд улам бүр дордох төлөвтэй байгаа. Хоёр улсын харилцааг "Хүйтэн дайн" гэж тодорхойлох нь ч ердийн үзэгдэл болжээ.

Байдены засаг захиргаанаас энэ сарын эхээр гаргасан гадаад бодлогын түр стратеги дээр "Хятад бол эдийн засаг, цэрэг, технологийн хүчээрээ АНУ-тай өрсөлдөхүйц цорын ганц өрсөлдөгч юм” хэмээн тодорхойлсон. Судлаачид ч гэсэн Хятад бол ЗХУ биш гэдгийг онцолж байгаа юм.

Зөвлөлт Холбоот Улсын ДНБ нь оргил үедээ АНУ-ын ДНБ-ий 40 орчим хувьтай тэнцэж байв. Харин БНХАУ-ынх арав хүрэхгүй жилийн дотор АНУ-тай ижил ДНБ-тэй болохоор байгаа. Хятад бол 19-р зуунаас хойш АНУ-д тулгарч байсан хамгийн хүчтэй өрсөлдөгч. Тиймээс судлаачид хоёр улсын харилцааг II Хүйтэн дайны тэмдэг биш, үнэн хэрэгтээ илүү аюултай сөргөлдөөний эхлэл ч байж магадгүй гэх таамаг дэвшүүлж байна. Хятад аль хэдийнэ АНУ-тай олон салбарт өрсөлдөгч болсон. Дэлхийн тэргүүлэх гүрэн болж хараахан амжаагүй байгаа ч цэргийн техникээрээ хэдийнэ АНУ-тай өрсөлдөхүйц болсон гэдгийг ажиглагчид онцолж байна.