ЦЕГ-ын тусгай хэлтсийн албан хаагчид ял авхаар болжээ

Одоогоос нэг жилийн өмнө ЦЕГ-ын тусгай хэлтсийн гурван ажилтан  архи уун согтуурхаж, бусдын биед онц ноцтой халдсан хэрэг гарсан. Тодруулбал, 2015 оны аравдугаар сард  цагдаагийн нэр бүхий гурван ажилтан согтуу үедээ хоёр иргэнийг зодож танхайрсан байна. Уг хэргийн улмаас  Элитийн батальоны дэд ахлагч н.Ууганбаатар амь насаа алдсан бол  өөр нэг иргэн  хүндэвтэр гэмтэл авч эмнэлэгт хүргэгдсэн байдаг. Прокурорын байгууллагаас шүүгдэгчдийг Эрүүгийн хуулийн зарим зүйл ангид зааснаар буюу танхайн сэдэлтэйгээр, догшин авирлаж, бүлэглэн бусдад хохирол учруулсан гэж буруутган яллах дүгнэлт үйлдэх саналаа Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүхэд хүргүүлжээ. Анхан шатны шүүхээс  н.Цэрэнчимэдийг Эрүүгийн хуулийн 91.2.2-т заасан зүйл ангиар буруутгаж чанга дэглэмтэй хорих ангид 20 жил, н.Төмөрбаатар, н.Батзориг нарыг жирийн дэглэмтэй хорих ангид тус бүр 3.1 жилийн ял эдлүүлэхээр шийдвэрлэхээр болсон байна. Гэвч гэмт этгээдүүд ял хүндэдсэн гэх үндэслэлээр давж заалдахаар гомдол гаргасан байна. Энэ гомдлыг өнөөдөр Нийслэлийн эрүүгийн хэргийн давж заалдах шатны шүүхээр хэлэлцэхээр болсон боловч прокурор нь ирээгүй гэдэг шалтгаанаар дахин хойшлогдлоо.

Г.Зоригтмаа