Нийлүүлэлт өссөнөөр зэсийн эрэлт буурч байна

“Trafigura Group” зэрэг худалдаачид Лондоны Металлын Бирж (LME)-д их хэмжээний металл нийлүүлсний дүнд мягмар гарагт зэсийн зах зээл дэх нийлүүлэлтийн хомсдол бага зэрэг суларлаа. Зах зээлийн анхаарлын төвд байсан, нэн даруй нийлүүлэх зэс болон гурван сарын дараа нийлүүлэх зэсийн үнийн зөрүү (spread) буурч, нэг тонн тутамд 248 ам.доллар болсон байна. LME-ийн дэлхий даяарх агуулахын сүлжээнд бэлэн зэсийн нөөц 20,000 гаруй тонноор нэмэгдэж, дөрөвдүгээр сараас хойших хамгийн их өсөлт бүртгэгдсэний дараа зах зээл дэх дарамт буурсан гэж худалдаачид үзэж байна.

Асуудалд ойр эх сурвалжуудын мэдээлснээр, мягмар гарагт Лондоны Металлын Бирж (LME)-д нийлүүлэгдсэн зэсийн томоохон хэсгийг "Trafigura" компани нийлүүлсэн байна. Гэхдээ бусад худалдаачид ч мөн тус бирж рүү металл нийлүүлэхээр бэлтгэж байсан аж.

Лхагва гарагт LME дээр нийлүүлэх зэсийн үнэ мягмар гарагийн хаалтын үеэр нэг өдрийн дараа гэрээний үнэ 79 ам.доллараар өссөн байна. Өмнө нь 110 ам.доллар хүртэл өссөн байв. АНУ руу чиглэсэн нийлүүлэлт огцом нэмэгдэж, дэлхийн жишиг гэрээнүүдийн үндэс суурь болдог Лондоны Металлын Биржийн (LME) нөөцийг бууруулснаар түүхий эдийн арилжаачид зэсийн зах зээлийг анхааралтай ажиглаж байна. Энэхүү хомсдол нь гол төлөв АНУ-ын импортын татварын бодлого хэрэгжих магадлалаас үүдэлтэй арбитраж (үнэ зөрүүний) арилжаанаас шалтгаалж, бусад бүс нутгийн нөөц шавхагдахад нөлөөлжээ.

LME-ийн агуулах дахь баталгаажсан нөөц (on-warrant stocks) Ази болон АНУ-д өссөн үзүүлэлттэй гарчээ.  IHS Markit-ийн тээвэрлэлтийн мэдээллээс үзэхэд энэ сарын эхний хоёр долоо хоногт АНУ-д 56,000 орчим тонн зэс нийлүүлэгджээ. Долоодугаар сард бүртгэгдсэн дээд үзүүлэлт болох 223,000 тонныг эс тооцвол энэ сарын нийлүүлэлт нь сүүлийн нэг жилийн хугацаан дахь сарын дундаж үзүүлэлттэй ижил түвшинд байна.

Дата төв болон сэргээгдэх эрчим хүчний салбарын эрэлт нэмэгдэж буйтай холбоотой өөдрөг хүлээлтээс үүдэн зэсийн үнэ энэ онд 13 орчим хувиар өсөөд байна. Энэ нь “Rio Tinto Group”, BHP Group зэрэг томоохон уул уурхайн компаниудын орлогыг нэмэгдүүлжээ. Тухайлбал, BHP-ийн жилийн нийт орлогын талаас илүү хувийг анх удаа зэс бүрдүүлсэн байна.

LME дээрх гурван сарын хугацаатай жишиг фьючерс хэлцлийн үнэ 1.2 хувиар буурч, нэг тонн нь 13,986.50 ам.долларт хаагдлаа. LME-ийн бусад үндсэн металлуудын үнэ ч мөн буурсан байна.

https://www.mining.com/web/historic-copper-squeeze-eases-as-traders-deliver-metal-to-lme/