Б.Ган-Очир: АН нэр дэвшигчдийнхээ 50-аас дээш хувийг нэр цэвэр залуучуудаар бүрдүүлээч ээ

Өнөөдөр буюу тавдугаар сарын 15-нд энэ оны УИХ-ын сонгуультай холбогдуулан АЗХ-ноос АН-ын дарга Л.Гантөмөрт шаардлага хүргүүлжээ.

АЗХ-ны Ерөнхийлөгч Б.Ган-Очир "2024 оны УИХ-ын ээлжит сонгууль хаяанд ирлээ. Өнөөдөр Ардчилсан Залуучуудын Холбоо 2024 оны УИХ-ын сонгуульд хэрхэн оролцох тухай хэвлэлийн хурал хийж байна. Энэ удаагийн УИХ-ын жагсаалтад АН залуучуудыг их нэр дэвшүүлээч ээ. Нэр дэвшигчдийнхээ 50-аас дээш хувийг дандаа нэр цэвэр, шинэ залуучуудаар эгнээгээ бүрдүүлж, АН-ын сонгон шалгаруулах хороо ажиллаач ээ гэдэг шаардлагыг Ардчилсан намын дарга Л.Гантөмөрт хүргүүлж байна. Энэ удаагийн сонгуульд эрх баригч Монгол Ардын Нам ялах юм бол ардчиллын сүүлийн сонгууль болох аюултай" хэмээжээ.