"Google"-ийн "Gemini 4 Argon" загвар хууль эрх зүй, санхүү, кибер аюулгүй байдлын нарийн төвөгтэй даалгавруудыг гүйцэтгэх чадвартай

"Google" компани хиймэл оюуны шинэ дэвшилтэт загвар болох "Gemini 4 Argon"-ыг лхагва гарагт танилцуулж, эхний ээлжид кибер аюулгүй байдлын мэргэжилтнүүдэд туршилтаар ашиглуулж эхэлжээ.

Энэхүү шинэ загварыг программ хангамжийн инженерчлэл, хууль эрх зүй, санхүү, кибер аюулгүй байдлын нарийн төвөгтэй даалгавруудыг гүйцэтгэхдээ гүнзгий дүгнэлт хийн боловсруулах чадвартайгаар бүтээсэн гэж тус компани мэдээлсэн байна.

“Google” компани хэрэглэгчдийн санал хүсэлтийг авч, аюулгүй байдлын хамгаалалтыг сайжруулахын зэрэгцээ “Argon”-ыг хөгжүүлэгчид, байгууллагууд, энгийн хэрэглэгчдэд “аль болох хурдан” нэвтрүүлэхээр төлөвлөж байна.  Түүнчлэн уг загвар нь программ хангамжийн эмзэг байдлыг бие даан илрүүлэх, шалгах, засах чадвартай гэдгийг тус компани онцолжээ.

“Google” компани мөн шинэ загварынхаа нэг удаагийн боловсруулалтын хязгаарыг 64 мянган токеноос 1 сая токен болгон нэмэгдүүлсэн байна. Ингэснээр "Argon" нь илүү урт хугацаанд дүгнэлт хийх, агуулга боловсруулах боломжтой болжээ.

Одоогоор “Google”-ийн олон мянган ажилтан “Argon”-ыг код бичих, судалгаа хийх, бичвэр боловсруулах зэрэг тусгай зориулалтаар ашиглаж байна гэж тус компани мэдээлсэн байна.